وين السر؟
وين السر انه كل الموبايلات فيها اغنية ليالي الشتاء الحزينة لفيروز و مقطوعة عزف غيتار على اساس حزينة و اغنية تركية؟
وين السر انه كل الشخصيات التاريخية في المسلسلات مثل اسمهان و انور السادات وجون غوم سو بالمسلسل الكوري جوهرة القصر_ انا من متابعي المسلسلات الكورية المدبلجة و اجدها ثرية اكثر من التركية_ كلهم صادفوا منجمين بحياتهم بحكولهم عن مستقبلهم المهم؟
و ين السر انه المسلسلات الكورية ما حدا بشوفها مقارنة بغيرها يعني عشان الدبلجة بالفصحى و الناس ما بحبوا يفكروا و لا عشان القصص شوي واقعية و حزينة؟
وين السر انه معظم الناس اللي بستخدموا الشات معاطيب _ اقول المعظم مش الكل_ و بفكروا انه اي بنت بدها تعطيهم رقم تلفونها و تزبطهم عشان ننوس عين مامته مقطوع شكله؟
وين السر انه اي شب بحب يزبط بنت بشيل موبايله و بتمنظر فيه مع انه ما حدا ما معه موبايل بغني و برقص بالبلد غير انا(3310)؟
وين السر انه ما في حدا بصدقني انه ما في شب بعبّي عيني و لو عباها بعد شوي هوه نفسه بفضيها؟
وين السر انك بتشوف الوحدة و الفجوة بتزداد مع انه وسائل الاتصال بايد كل الناس بس ما حدا سائل على حدا و الكل بزعل انه ما حدا بسأل عنه؟
و ين السر انه لما الناس بطلعوا على السوق يوم السبت بعلقوا على الناس اللي بالسوق انهم ما بفهموا عشان طالعين كلهم بنفس اليوم و مستعجلين على الشراء اللي ما اله داعي, طيب اللي بحكي كان بالسوق بنفس اليوم ليش بتفلسف؟
وين السر انه و لا مره غلط حدا معي و رن على موبايلي بالصدفة او بعثلي مسج؟
وين السر انه اي مشروع بفكر فيه بفشل فشل ذريع من كل النواحي و يجهض قبل ولادته و كانه الظروف كلها ضدي؟
وين السر اني بتعود على الكسفات و ما بزعل كتير و بعصّب خاصة قدام الناس؟
وين السر انه النواحي الجمالية بالصور المرسومة او الفوتوغرافية ما حدا بشوفها اذا كانت اباحية او وصخة بالتعبير الاردني ؟
و ين السر انه الحكي بضيع بسرعة منّي؟