اخص علي شو عادية
بدي افضفض عن مشكلة البنت العادية جدا او اقل من العادية زي حالاتي أنا
أنا كمعظم البنات بنت عادية كتير سمرا و مش بيضة و مربربه و لا بعجب النسوان الخطابات و لا حتى بس اسبل عيوني هيك بوقع الزلمة صريع العيون السود زي كلام الشعر الجاهلي و لا حتى ناعمه بسوسح الشب و لا أي اشي بخطر في بال أي حدا عن البنت البنت ...من الآخر عادية كتييييييير و ما بحب اوصف حالي عشان ما في اشي افخر فيه و كمان عشان الحرام و الحلال مع اني مش عارفة أي السببين اهم... نهايته مش كتير حلوة و بنفس الوقت مش كتير بشعة يعني ماشي حالي بس و الحمد لله و احيانا مش ممكن تلاحظ حتى اني موجودة بحكم هدوئي و مرات بتلاحظني كثير بحكم نفس الهدوء الغريب و لا يمكن تجاهله اضافه الى اني من عيلة كمان عادية يعني كل شي عادي و يحتمل بالتالي يكون احسن شوي او اسوأ شوي
المهم البنت اللي زي حلاتي او حلاة البنت اللي بتقرا او اخت الشب اللي بقرا او بنته او حتى حبيبته لما بتكبر شوي وبغض النظر عن مستوى التعليم و الثقافة و أي اشي وتوصل لسن الزواج اللي يعني كل بنت من حقها تحلم فيه بس المجتمع و الناس بحولوه لكابوس قسري سواء حصل الزواج او ما حصل
بتبلش نظريات الاحتمالات و اللي ممكن يصير او ما ممكن يصير تتطبق عليها اما بشكل مباشر او غير مباشر يعني بشكل مباشر بتسمع من الناس قليلات الزوق عينك عينك انه مين بدو يوخدها و يقبل فيها و هيه عادية بهالشكل المخزي و بحاولوا بفهموها انه مين ما كان اللي خطبها لازم تمسك فيه بايديها و سنانها لأنه مقطوع شكله و مصنع الرجال خلص انتاج عنده ووصلك اخر نسخة و كالعادة برأيهم ما بوصلك الا الاخر و يكثر خير الله و خيره لانه تطلع فيكي بحكم انه اخر تطور للرجل وصلك اخيرا
اما بشكل غير مباشر لما بوصللك الناس كل الافكار السابقة لكن بطريقة منمقة اكترو السبب بهالحالة مش الادب... بس عشان يعموا بصيرتك عن ارائهم الدون فيكي ولا كأنهم مستخفين فيكي و لا اشي
يعني لو خطبك واحد حفرتلي و ما بسوى شلن و لابس جاكيت فوتيك و زنوبه و بنطلون نفخ (كونز ابو مراه ) و ما بعرف يحكي كلمتين على بعض و امه بتحكي عنه اسمه _مش انه عاهه و لا اشي على سلامته بس خجول_ بطيروه للسما و اذا ما رضيتي فيه و اظهرت نقائصه و عيوبه اللي بتشوفيها برأيك بتكوني كتير متطلبة و رح تقطعي نصيبك بايدك متبوعة بنظره حسره على شبابك اللي رح تطيريه ومن ناحيتك بتبدا حربك النفسية مع حالك انه انت غلط و بتتنيلي على عينك و بتكوني رح توافقي بس الله بنقذك من فخ عدم الثقة و ما بتوافقي
و اذا خطبك واحد فيه صفه وحده منيحه و الباقي مش و لا بد... مثلا حلو و مش متعلم و لا مقتدر بحكولك ميت وحده بتتمناه خذيه يا هبله قبل ما وحده مقلعه تهفه و لانه انت بدك تصمديه مزهريه او كانك بهوشه مع وحده افتراضيه ولا عمرك سمعتي فيها او كان في تلميح واحد لوجودها و لازم تفوزي فيه تنتنصري على أي بنت بحكم انك بنت و طبعا بلاش احكيلك قديش امه و اخته رح تعرط انه كل بنات الجيران و الحارة اللي فوقهم و تحتهم استكتلوا عليه و التلفونات ما بتوقف رننننننننن بس هوه و لا حدا هون يعني تلميح انه مؤدب و امه ما بتنسى ذكر بنت عمه اللي ماتت على تطليعه منه بس هوه لأنه بفهم ما بده يوخد من قرايبه و الهدف من اضافة بنت عمه هو نكاية بأمها سلفة امه و اهداف سامية اخرى العاديين اللي زينا صعب يعرفوها و افهمي يا شاطرة و اذا كان مرتاح شوي ماديا و بشع بقولولك الشكل مش كل اشي هوه انت عايشه تتصفني فيه و عشان يضيفولك شويه واقعية على اسلوب الاقناع _يعني مش قصدهم يبهدلوكي بالمره _ على طول بحكولك : يعني بصراحة انت مش احسن كل واحد يتطلع على حاله و الحقيقة انه من ورا كل المقدمه اللي بتوصل لهالجملة هوه رواسب دفينة و بدهم يحكوا هالكلمتين بدهم يحكوهن و اجتهم على الطبطاب مناسبة ليحكولك انك مش حلوة و ما حد اصلا بعطيك ثلاث ثواني من وقته و بسألك "ليش ما بدك؟" و الارجح بهاي اللحظة اللي بهدلوكي فيها بتكتشفي انه انتي اصلا ما فكرتي بشكلة بس ما بدك اياه لأنه عندك اسباب تانية اكبر و اعمق و اهم من الشكل و بتتندمي لأنك حكيتي عنه اصلا و بتتمني انه ما يرجع ابدا عشان يحلوا عنك وما تبيني مغرورة و ما بعجبك العجب _لأنه بسلامته عجب_ و مع كل ما يحمله عدم اعجابه بشخصك المتواضع من اهانة لانوثتك الا انه بهيك موقف بتنبسطي كتير عشان رح تبني ضحيه مش شعنونه
بس المشكلة الاعظم لما بيجي واحد شوي محرزو عليه العين و فعلا بعجب الكل مبدئيا بمواصفاته _مش شخصه_ يعني شبيب دارس و حليوة و متعلم و مقتدر بتكون ردود الافعال تنقسم كالتالي:
اما ما حد بسألك عنه و كأنه الحدث كله مش موجود عشان ما يكبر راسك و احيانا بوصل الغرور فيهم و الحقد و بحكوا انهم ما سالوا و حكوا كتير كعادتهم عشان ما تتاملي احلام خيالية مفترضين مبدئيا انها مش رح تصير و بتكون البهدلة بهالحالة مضاعفة لانهم كمان بفترضوا انك خيالية كتير و بتبني قصور بالهوا
و ردة الفعل التانية لما بحكولك انه اكيد مش رح يرجع لأنك اكيد ما عجبتية و لانه واحد غير بده وحده غير و اكيد أنا و انت مش غير
و الثالثة لما بيرجع و بتعجبيه و مع سخافة الموقف الا انه برفع شوي اسهمك مع حالك و مع المجتمع بتبلش الحاسة السادسة اللي و لا عمرها كانت موجودة عندهم بالظهور عشان يحكولك انهم مش حاسين خير مش مش متمنينلك الخير و الموضوع مش رح يتم و الله يجيرنا من الجايات .. و الله يعين هالحاسة السادسة شو بدها تتحمل لتتحمل ذمم ناس
والطامة الكبرى بتكون لما هوه يوافق عليكي و انت ما توافقي عليه لانه اكيد وحده زيك لقت واحد يجبرها لازم توافق بسرعه بغض النظر تماما عن الشخصية اللي بتتمنيها و ما رح اشرح ردود الفعل على الحالة ... الصمت ابلغ
وهيك الكل بحاول قدر الامكان من يوم ما بدأت تظهري على وجة الارض كفتاة عادية زي 90% من الموجودين _والنسبة غير مدروسة_اصلا يفهمك انه ما عندك فرصة باشي و انه كل شي منيح كتير عليكي بس و مش كتير على حدا تاني وزي ما بحكو الامريكان
Enough for me, too good for u
و بتتأصل فكرتك عن حياتك و مستقبلك بواحد من الاتجاهيين
الاول : بتحكي لحالك على طول انك اقل و فرصك بكل شي شبه ملغية و منيح اذا كنترول الباص بصبح عليكي و بحكيلك ايش يا احمر حتى لو كنتي مش لابسة احمر يعني هوه كمان مش شايفك بس بصبح عليكي من قبيل العادة لا اكثر و شكرا للطبقة الكادحة اللي ما بتنسانا
و التاني: بتدعمي حالك لحالك طول الوقت و بتتاملي اكتر و احسن من الحياة مع لحظات سقوط نفسي اكيد بتشكي بحالك فيها اذا انت احسن ولا بتكذبي على حالك !! و اضيف هنا انه الافكار الايجابية بتخبيها مع حالك عشان الناس اذا اتطلعوا عليها بتبيني كتير محزنة و مثيرة للشفقة لعدم ملامستك لواقعك المر و ما بفهموا انك متفائلة زي ما انت فعلا ( يا حسرتي البنت مخها ضارب )
و اكيد كلا الوضعين متعب و يحمل الكثير الكثير من الصراع النفسي و استهلاك الجهد و الأعصاب و كأنك طول الوقت في منافسة مع المستقبل و النصيب و المجتمع و لازم حد يفوز فيها و ما بتخلي الامور تمشي زي ما الله كاتب
و مهما كان ماضيكي بالخطبة مخزي او مشرف فهو رصيد الك بالمستقبل عشان تحكي انه بتاريخك خطبك فلان اللي كان وضعه هيك و تهتي على جوزك المستقبلي انه اجاك احسن منه بس النصيب رماه عليكي و طبعا ما حدا قاري ورق ف الفي على كيفك
وما بنسى اضيف على الهامش انه الشب اللي بحب بنت عادية و بودي امه عشان تخطبها بتروح امه على ابنها عشان تنتقدها انها عادية.. والله ما بتستحي على حالها .. مش الام طبعا البنت.. ما بتعرف تكون غير عادية بهالشكل الفاضح و الملاحظ جدا و احيانا مخجل
و مع كل هالميمعة بننسى انه الله كبير و ما بضيع مخلوق هوه خلقة و انه الدنيا مليانه فرص ف مش معقول انه نقسم العالم لعوالم بنفصل فيه البنات الحلوات اللي بفكوا حبل المشنقة و ما حد بقرب _حور العين الارضيات_ الا الشباب الكمل الحلوين الدارسين الغني و الناجحين و اكيد المحترمين الدينين
و بعدين عالم تاني للبنات الدارسات و ثالث للي مش دارسات و هيك لحد ما نتفوق على داروين بالهرم الاجتماعي
وحتى لو كنت بنت مش عادية فانت اكيد بتعاني من هالمشكلة بشكل او اخر فالجائزة الكبرى على كونك مش عادية هي دائما و ابدا الرجل... أي رجل
أنا بس بدي احكي للناس كلهم انه الحياة كبيرة كتير و قانون الاحتمالات بوسعنا كلنا و كل واحد اله نصيبه ف ليش بنعمل ببعض هيك و بنحل و بنربط من عنا و كأنه اقدار العالم بايدينا
مرحى للبنت العادية
و مرحى كمان للبنت العادية اللي ما مرت ولا بأي مرحلة من المراحل السابقة
ومرحى اكتر للبنت العادية و مش شايفة حالها عادية و ما قرأت المقال لانه ما بخصها
كل واحد بالآخر بياخد فرصتو بالحياه و كل بإيد ربنا بس العالم بيفكرو حالهم شاطرين
انا كنت مثلك هيك تماما لكني كنت مصره على نوعية الانسان اللي بدي آخذه وكنت اسمع تعليقات قد تصل الى مستوى الحقيره والنابيه الا انني لم آبه وتزوجت انسان الكل كان مبهور فيه طبعا الحمدلله على هيك نعمه انا كنت طالبه علم ودين وهو صاحب علم ودين واكبر مني بس بسنه كمان يعني ما أخذت واحد قد جدي زي ما كان الكل متوقع ...
انا رح اجاوبك على سؤالك هون انا متزوجه من امريكي {اجنبي غير متحدث بالعربيه }
بالتوفيق