فعلا انها مشكلة و عويصة كمان .. انك مش فاهمني و انا مش فاهمتك

في سؤال اهم من العتب

شو عملنا عشان نفهم بعض صح او غلط.. احنا بذلنا جهد جهيد عشان نوصل لفكرة معينة بادمغتنا عن حالنا و صورة بادمغة الناس عن حالنا و صورة كمان عن الناس بأدمغتهم و صورة اخيرة و خطيرة عن الناس بأدمغتنا

و الصور الاربعة السابقة كلها غلط

هاد مش حكي مسلسلات و افلام عربي يا اخوان.. لأنه سوء الفهم قضية.. لأنه جزء كبير من وجود القضية اننا فاهمينها غلط و صارت قضية و قيس عليه

مرات بتكون المشكلة انك بتعطي للناس حجم اقل منهم و هاي مش قليلة اكيد بحقهم بس في مشكلة اضخم من هيك لما تفهم الناس غلط و تعطيعم حجم اكبر من حجمهم و هاي مش بس مشكلة .. هاي كارثة.. جريمة بحق البشرية .. لأنه الاخ الصغير الكيان و العقل و الفهم ... فجاة صار كبير ..بضيع و ما بعرف كيف بده يتعامل مع هالوضع الفضفاض.. وضع في مساحة بيغرق فيها و هات حلها يا حلّال.. و اذا كبر الراس ما بصغر للأسف بس بينكسر و الكسر بده كتير .. جهد نفسي و عقلي و زعل ووووو....فعشان هيك نصغر الناس و يزعلوا اهون بكثير من اننا نكبرهم و نزعل و الاحسن نحكيلهم مين همه صح

و في اشي كمان اخطر من كل ما سبق

نفهم حالنا ؟

بس كيف؟

يعني لا تحكي لحالك انك حساس. احكي الصحيح انك مبولد زي التمساح بس بتعمل افلام و ظالم الاحساس معك

لا تحكي انه نفسك طيبة و كريم بس ما معك.. احكي انك بتفوز بالماراثون اذا بتشوف شلن على خط النهاية

لا تحكي انك مشتاقلي بس مش فاضي و ما معك لرصيد.. احكي ما بدك تحكي.. و صدقوني ما بهمني.. نادرا ما زعلت من حدا.. بالعكس.. دايما بزعل من حالي بس يصير معي موقف و بحس اني وصلت صورة معكوسة و غير حقيقية عن حالي للناس.. مرات مش قصد.. لكن المثالية ذابحيتنا ذبح.. و بدنا نصير مثاليين غصب عن انوفنا و خلي المدينة الفاضلة تدفن حالها قد ما احنا فاضلين.. و ين الاشكال اذا الواحد صار واحد مع حاله و توحّد مع ذاته و صارت حال حاله اهم حال بالدنيا..

لا تفكر غلط ياللي بتقرأ.. هاي مش انانية ابدا و لا تعمل حالك مثالي كمان .. مش ناقصني فلسفات.. 25 سنة و انا بتفلسف على حالي و سمحت ل 100 واحد يعملوا اساتذة علي

هاد اسمه نضوج... ليش بنكبر و بنعمل أي اشي عشان نستقل و بالاخر بزعلنا اذا اكس من الناس ما بعثلنا مسج بالعيد

بصراحة ما بهمني

و لا حدا بهمني و عشان ما بفكر بالاهمية كتير عندي متسع احبكم كلكم و من كل قلبي لأنه في مساحة واسعة مش للعتب لازم اشغلها

وبتعرفوا انه مرات كتير بنفكر انا بنحكي للناس من بره لبرا و بنمشي الحال معهم و بدنا بس السترة و الامور تمشي و على اساس فاهمين حالنا بس بنطلع بالاخر متوضيين و مش فاهمين اشي و اكتر المرات لما بنزعل بنزعل من انفسنا و لما بنحكي فلان قصر معي و زعلني ابدا ما بننتبه انا وصلنا حالنا غلط

جد ناقصنا اشياء كتير

ناقصنا نحترم حالنا قبل ما نطلب من الناس يحترمونا

يعني نصدق مع الناس و نحترمهم و ما نكذب و رح نلاقي مردوده كله على اشخاصنا احنا

و الله هاي مش كذبة

نصيحة مجرب و حكيم